Pages

Search about Cooperatives

Monday, March 1, 2010

Ating Koop: Hiniusang singgit alang sa kausaban!

Dunot o bulok ang atong matang sa politika, nga gisakyan pa gayod sa mga bulok usab nga mga lider. Sa panahon sa kampanya, haring lungsod ang ilang tawag kanato. Kon makahupot na sa gahom, sila na ang gahari-hari, hinikalimtan ang lungsod.
Sayon kini mahitabo kay gitugotan man nato. Ang atong walay pagpakabana sa ilang mga hiwing binuhatan, mihatag kanilag lisensya sa pag-abuso sa puesto. Ang atong pagpakahilom sa ilang kalapasan, miaghat kanila sa pagbaliwala sa ilang gipanumpaang responsibilidad. Mga national man nga mga lider (Marcos, Estrada, GMA) o mga local nga opisyales, ilang gihimo ang ilang mga nahimo kay wala man kita mobarog sa atong katungod.
Sa atong pagbaligya sa atong boto, o sa atong pagpangayo/pagdawat sa hinabang gikan niining mga mapahimuslanong politiko, atong gisalikway ang atong katungod mga mangayog husay sa ilang binuhatan sa paghupot sa gahom.
Kon gusto kitag kausaban, niining piniliay sa Mayo 2010 gikinahanglan ang atong madasigong panginlabot. Atong ipakita nga ang tinuod nga gahom sa demokrasya nagagikan sa hiniusang kusog sa katawhan.
Among giaghat ang tanan sa pagpamalandong kon kinsa ang angayan mohupot sa renda sa pangagamhanan. Ayaw pahaylo sa mga matam-is nga saad, o sa mga pasalig nga tingusbawan. Tan-awa kon kini nga mga politiko wala ba migamit sa ilang puesto aron pagpalambo sa ilang negosyo o pagpatambok sa ilang bulsa.
Giaghat usab ang tanan sa pagpaningkamot nga modaug ang Ating Koop Party List. Gawas sa imong sakop sa pamilya, hangyo-a usab ang imong mga higala, kaubanan, silingan, kauban sa buhat o kapunongan sa pagboto usab sa Ating Koop. Sa talaan sa COMELEC, ang Adhikaing Tinataguyod ng Kooperatiba (Ating Koop) ika-numero 29.
Lahi karon ang sistema sa pagbotar. Tanang mga kandidato, gikan sa pagka presidente, vice-presidente, senador, ngadto sa pagka kagawad sa dakbayan o lungsod, nalista sa balota. Ang himoon lang sa botante mao ang pag “shade” o “blacken” sa lingin o circulo (O) nga naa mahimutang una (before) sa ngalan sa kandidato nga gusto mo iboto. Pananglitan, ang gusto mo iboto pagka presidente si Noynoy Aquino, imong ituman (blacken) ang lingin nga nag-una/abay sa pangalan Benigno “Noynoy” Aquino.
Mao gihapon sa Party List. Adunay 144 ka mga kandidato sa Party List, apan usa lang ang puede nimo botohan. Paghuman nimo pag “blacken” sa imong piliong presidente (usa lang ang i-blacken), vice president (usa ra usab), senador (maximum sa 12), adto dayon sa ika-29 nga Party List. Itumi (blacken) dayon ang lingin abay sa Ating Koop. Palihog tudlo-i usab ang sakop sa imong pamilya, higala, kaubanan, silingan, kauban sa buhat o kapunongan sa bag-ong sistema sa pagbotar. Ayaw hikalimti pag aghat kanila sa pag “blacken” sa ika-29 nga lingin nga mao ang Ating Koop.
Ang Ating Koop maoy tumong ang paghaw-as sa mga kabus sa kalisdanan pinaagi sa Kooperatiba. Moasdang kini sa mga balaod-non nga magpalig-on sa kooperatiba ug sa mga kalihokan nga makatabang sa mga kabus. Ang Ating Koop dili makipagnegosasyon o makipagtransaksyon sa mga hut-ong nga maoy tinguha ang pagpalambo lang sa interes sa pipila.
Ang boto alang sa Ating Koop usa ka singgit nga husto na! Bag-ohon na ang matang sa politika. Ang boto sa Ating Koop boto alang sa kalamboan sa kinabag-an. Ang boto sa Ating Koop pagpatigbabaw sa “transformational politics.” Ang boto sa Ating Koop mao ang paghunahuna sa kaugmaon sa atong nasud ug sa atong mga anak.

No comments: